محرمعلینین گولوشلری؛ گول دونیایا، دونیا گولسون سنه!
دونیانین چتینلیکلرینه قارشی محرمعلی حسنزادهنین بیر بؤیوک سیلاحی وار: “گولوش”.
او هئچ بیر زامان دانیشیب گولمهییندن قالمیر. نگرانچیلیق و داریخماق اونا بیگانهدیر. هر بیر اتفاق اوز وئرسه وئرسین، او روحیهسین اوتوزماییب و بیرین گولندن سونرا موشکولو حل ائلهمهیه چالیشیر.
بیر ایل بوندان قاباق بیر تصادف نتیجهسینده اؤزو و بیر اوغلو چوخ یارالانیب یاتاغا دوشموشدولر. آما محرمعلی بی یئنه ده تصادف صحنهسیندن بیر طنز ماجرا قوشوب، یانینا گلنلره تعریفلهییب گولوردو!
محرمعلی حسنزاده ایشینده چوخ چتینلیکلر ده چکیر و ائله زامان اولور پولسوز دا قالیر. آما بونلارین هئچ بیری دلیل اولمور کی او ایشیندن و دونیاسیندان لذت آپارماسین. او دونیانی چوخ ساده توتوب و یاشاییر. او گؤردویو ایشین پولونون آز چوخونا باخماییر و تکجه گؤردویو ایشین کئفین سورور.
محرمعلینین چوخ طنز محتوالی و آدامی فیکره جومدوران سؤزلری ده وار. بیر گون سؤز اوشاقلاری چوخ اَزدیرمکدن دوشموشدو کی گؤردوم دئییردی: بیزده هئچ شانس یوخدور. بیز اوشاق اولاندا بؤیوکلرین ارزش احترامی چوخ و اوشاقلارین “ایتین دال قیچیجاق ارزیشلری یوخویدو”. اوندا من آرزی ائلیردیم تئز بؤیویوب و ارزش احترام صاحبی اولام. آما من بؤیویندن سونرا ایش ترسه اولدو! بو دفعه اوشاقلار ارزشه مینیب بؤیوکلر ارزشدن دوشدو! هئچ بئله ظولم اولماز!
آللاه ریضاسی محرمعلی بی دوز دئییر. بیز اوشاق اولاندا ددهمیزین قورخوسوندان “سیچان دلیگین ساتین آلاردیق” آما ایندیکی اوشاقلار ددهلرینین باشینا اود تؤکور و دده یازیق قادیر دئییل بئله اؤزوندن دفاع دا ائلهسین. بئیناوا دده ده سؤز یوخدور. آخی هر صورتده حاقّی اوشاقا وئریب یازیق ددهنی دانلایاجاقلار و چوخ زامان قانونلو و اوشاغی بئباش اؤتورمهیَن ددهلره، دالی و ساوادسیز لقبی ده وئریرلر و اؤزلرینین جیبیلداق و چیی اوشاق تربیت ائلهمکلرینین آدین “روشنفکری” قویورلار. دئسن روشنفکرینی بخش ائله، ننهم اؤلموشو هامیسی آغزین گؤیه آچیب مات-مات قالارلار. آما دونیانین سیاستیندن ده باشلاری چیخیر! هن محرمعلی قارداش! بئله اولور ایندیکی بو روشنفکرلر تربیت ائلهدیگی جاوانلار شالوارلارینین گئیمهسین باشارمیرلار! آدام بعضی مجلیسلرده لاب دوزو اؤلوب اَریییر! دالدان بو جاوانلارین بوتون آبیرلاری ائشیکده قالیر!
چوخ گولمک فضاسیندان اوزاق دوشمهیک دئیه آشاغیدا محرمعلی بیین اوشاقلیقداکی عکسلریندن بیرین قویوروق. باخیب و گولون.
محرمعلی بی قدیم یولداشی روستم عبداللهینین کناریندا
دونیا ایکی گوندی پس گول تا دونیادا سنه گولسون
Cahan ki, solmayan bir bağça-bağdır,
Burda rəvamıdır gülmədən ölmək!
Yazıq o şəxsə ki, qaraqabaqdır,
Nə qədər yaraşır insana gülmək!
دنیانه دمینن توتسان دمینن گدر غمینن توتسان غمینن گدر