پیشیک بارهسینده چاربورجدا ایناملار
پیشیکلر چاربورجلولارین ایناملارینا گؤره آیری حیوانلاردان بیراز فرقلیدیلر. پیشیکلرین بیرازی “جین” بیرازی دا ملک (فرشته) اولور. بونا گؤره پیشیکلری ووروب اذیت ائلهمک یاخجی بیر ایش حسابلانمیر. چون کی سن بیلمیرسن ووردوغون پیشیک جیندیر یوخسا فرشته. فرشته اولسا گوناها باتیب، جین ده اولسا اذیتین چکرسن.
حتی خالق ایچینده بونا گؤره بیرسیرا دستانلار دا وار. و خالقیمیزین اینانجینا گؤره چوخلو پیشیکلر جینلرین تویوندا حضورلاری اولوب چالیب اوینویورلار. حتی بیر گون ایکی نفر چؤلده سو سوواراندا بئله بیر تویا راست گلیرلر کی تویدا اوینویانلارین بیری، سوچولارین بیرینین پیشیگی ایمیش. پیشیک بونلاری گؤرن همین گؤزدن ایتیر و بیرداها اونلارا ساری گلمیر.
پیشیک چوخ نازلی و قورخوسوز بیر حیوان اولسا دا چاربورج خالقینین ایناملاریندا او جمله حیوانلارداندیر کی “اوستونده عزراییل’ین توکو وار” ! بو سؤزون آنلامی بودور کی پیشیک هر آن چوخ قورخولو بیر حیوانا چئوریله بیلر. پیشیکدن سونرا چاربورج خالقینین باورینده ایلانین اوستونده ده عزراییل ین توکو واردیر.
پیشیکلرین چاربورج و ها بئله آذربایجان فولکلوروندا او جملهدن، تاپماجالاردا، بایاتیلاردا، و آتالار سؤزونده اؤزل (ویژه) بیر یئری وار. پیشیک آذربایجان فولکلوروندا مغرور، چیلیس و ادعاسی یوخاری اولان اینسانلارین تمثیلیدیر.چاربورجدا پیشیک بارهسینده ایشلهنن بیر نئچه آتالار سؤزو وار. بونلاری اوخوساق سؤزوموز یاخجی یئرین تاپار:
– پیشیگه دئدیلر میندارین درماندیر میندارلاییب اوستون کورلادی!
– پیشیگین آغیلسیزی دئیر: قئیقاناقدان پاییم وار اؤزو ده چینی قابدا!
– پیشیگین اَلی اَته چاتمیر دئییر مینداردی!
– پیشیک دئیر: ییهمین یئددی قیزی اولسون یئددیسی ده کور اولسون!
– پیشیگی چوخ قیسناسان قاییدار آدامین اوزون جیرماقلار!
