من بیر قارتالام – ابوذر خیریان’دان بیر شعر
چاربورج‌لو شاعیر ابوذر خیرانی (تورکش آوشارلی)
ابوذر خیریان 1363-جی گونش ایلینده بالا چاربورج‌دا دونیایا گؤز آچیب. اؤزونون دئدیگینه گؤره 1375-جی ایلدن شعر یازماغا باشلاییب. ابوذر (اباذر) تورک دیلی و ادبیاتینا و آذربایجان یوردونا دَرین بیر سئوگی ایله یاناشیر. بونا گؤره چوخ چتینلیک‌لرله آنا دیلی‌نین یازیب-اوخوماسینی اؤیرَنیر و اؤز دوغما دیلینده شعر یازماغا باشلیر. سونرالار ابوذرین حایاتیندا چوخلو مادی و معنوی مشکل‌لر و چتین‌لیک‌لر باش وئریر. چوخ تاسف کی ابوذر هئچ بیر یئرده یازدیغی شعرلری پایلاشیب یایا بیلمیر. آما بونلارا باخمایاراق ابوذر هر زامان چالیشیر آذربایجانیمیزین یوخاری فرهنگین، تاریخین و دیلین هامی‌لارا تانیتسین. آشاغی‌دا گلن شعر ابوذرین یوزلر بیت شعریندن بیر نمونه‌دیر کی عزیز اوخوجولارا تقدیم ائدیریک:
من بیر قارتالام
من بیر قارتالام گؤی‌لرین اوزرینده
هی … داغلار زیروه‌سینده
قاناد چالیرام
وار ابهّت کؤنلوم‌ده
خوش دانیشیق دیلیمده
غیرت دولودور داماریمدا
گؤرورم نه‌لر کئچیر دیاریمدا
آما یانلیز بیر ایپ چکیبلر دؤورومه
کدردن گوزگو تاخمیشام گؤزومه
سَسیم یوخ، هاراییم یوخ
دانیشیرام اؤز اؤزومه
سَسیم ییغیلیب بوغازیما بوغور منی
اکینچی بیچیر ییغیر، ارباب آپاریر خرمنی
یوخ الیمده اختیاریم
یانیمدا دئییل نیگاریم
قارتالام آما، قریب گؤیرچین سایاغی دَن‌سیزم
کؤنلوم آمبار-آمبار سؤز ایله دولودور آما دیل‌سیزم
بیر یووا تیکدیم آغاجین باشیندا
چوخ اؤنجه‌دن سونرا یئتمیش یاشیمدا
یا بو فلک‌دیر ایجه‌شیر من ایله یا بو آدام
واقیفم شرطی یارادیر بو حیاسیز آدام
هئی چؤپ اوزالدیر یوواما
وارلیغیمی آلسین الیمدن یئدیرتسین اوودوخ (ائیران) یالاما
یوخ بیر دینجه‌لیگیم اؤز یووام‌دا
قالماییب دلی‌لردن نه ساغیمدا نه سولومدا
امینم کی ظولم یئرده قالا بیلمز
ظالیم منیم حاقّیم ایله تانریم ایله چالا بیلمز
منیم حاقّیم اؤزوم‌له حالال‌دیر، یوخ آیریسینان
خبر آلگینان بلقیس و سلیمان‌دان
وار هله اومود دیله‌ییم بو یاشاییش‌دا
ساچیم آغارسا دا، دَن دوشمه‌ییب قاشیمدا
گله‌جک آیدین‌دیر بونو آنلاییرام
پارلاق کیمی تانری‌نین سؤزون اوخویورام
یئنه وار نفس شوکر ائدیرم تانریما
آلقیشلاییرام آیدین گونو
سحرین اَسَن یئلینی
سئوینج ایله باسیم باغریما
یئنه اوجا داغلارین زیروه‌سینده
شیهه چکیب من باغیرام
تورپاق آلتدا قالان دلی‌لری
بیر-بیر چاغیرام …
چوخ گوزل.