آغالیق قاباغی خبرگزاری‌سی: بالا چاربورج دهنه‌سی ایشلَندی
بو عکس ساتیلمیش کندی‌نین یاخینلیغیندا اولان بالا چاربورجون سو آرخی‌دیر کی خالق ایچینده بوغازا مشهوردور.
دهنه ایشلَمه‌یین قدیم زامان‌لاردان چاربورج خالقی‌نین ایچینده خاص بیر اجتماعی جایگاهی وار. دهنه ایشلَمه‌یین اهمیتی چاربورج خالقی‌نین سووا باغلی اولان یاشاییش‌لارین گؤرسَدیر. دهنه ایشلَمک سویون یولون آچماقدیر و بو چوخ مثبت بیر ایشدیر. هر کیمین کی اکین یئری و سو نوبتی (حق آبه) وار گرک دهنه ایشلمه‌یه گئتسین. بو ایش چاربورج خالقی‌نین مدنی همکارلیق‌لارین و اجتماعی بیرلیک‌لرین گؤرسَدیر. دهنه ایشینه باغلی بیر نئچه جالیب ترمین وار کی آشاغی‌دا گتیریریک:
– پئیکار / جارچی: کند ایچینده جار چکردی کی دهنه ایشلَمک زامانی چاتیب و صاباح جوته بیر آدام مچید دیبینده حاضیر اولسون. بو ایش ایندی مچیدین بلندگوسوندان اعلام اولور و یا قوجالار قفه‌سینده دئییلیر.
غلام عمی بالا چاربورج دهنه‌سینده چوخ کلانتر اولان شخص‌لردن بیری‌دیر.
– کلانتر: دهنه ایشچی‌لری‌نین باشچی‌سی. کلانتر ائلین آغ ساققالی و مدیریتی گوجلو اولان بیر کیشی اولور کی ایشی وَر اؤلچمک، ناهار-نَشتوولوغا چیخما زامانین اعلام ائلَمک و ایشین یاخجی قاباغا گئتمه‌سینه نظارت ائلَمک‌دیر. کلانتر نه دئسه هئچ کیم اونون سؤزوندن چیخماز.
– وَر/ وی: ایشچی‌لر دهنه ایچینده صفه دوزولور تا کلانتر هر کسین ایشلَدیگی سهمین اؤلچوب معلوم ائله‌سین. هر سهمه بیر وَر دئییرلر. کلانترین اَلینده بیر اوزون سولاق (سولوق) یا بئل اولور کی اونلارلا وَرلری اؤلچور. معمولا هر بیر وَر اوچ یا دؤرد بئل اوزونلوقدا اولور.
– قویروق وئرمک: کلانتر وَرلری اؤلچوب بیر علامت قویور کی معلوم اولسون بیری‌نین وَری هاردان باشلاییب هاردا قورتولور. آما زامان اولور کی بیر مازارات آدام بو علامت‌لره اَل آپاریب و اونلاری اؤز نفعینه آزالدیب چوخالدیر. بو ایشه قویروق وئرمک دئیَرلر.
