چیلله گلیر قارینان/ قارپیزینان نارینان

یاواش-یاواش چیلله نین سسی گلیر؛ ایلین لاب اوزون گئجه سی؛ خالقیمیزین اینامینا گؤره بو گئجه ده گره ک دیر ائوینده تک اولمیاسان؛ بو گئجه ده ظولمت و قارانلیق ین لاب اوزون عمرو وار؛ بو قارانلیقا ایشیق وئرمک لازیم دیر بو گئجه ده بیرگه اولماق لازیم دیر. قارپیز، نار، آلما، میلاخ(اوزوم) ،ایده، کودو(قاباق)هئیوا و…هامیسی بیر بهانه دیر بیزی بیر یئره ییغماغا و بو گئجه نی بیرگه یاشاماغا. بو گئجه نین سویوق ظولمتینه قارشی آنالاریمیز کورسو قویوب، آتالاریمیز ایسه اود یاندیرالار. بو گئجه ده گرک دیر عیبرتلی و گؤزل سؤزلر دانیشاسان. بو گئجه ده آتا-آنالار اؤیودلو ناغیل لار دئییب و اوشاقلارینی اینسان کیمی یاشاماغا تشویق ائدرلر. بو گئجه ده اوشاقلار اؤرگنیرلر کی قارانلیق نه قدر اوزون اولسادا بیر اولسالار، دانیشیب دئییب گولسه لر عمرو آز اولاجاق و آیدین گونش یئنی دن دوغاجاق.
چیلله گئجه نیز بوتون آیدین لیق لارلا دولو اولسون همیشه آغزی شیرین و خوشبخت اولاسیز.