ساوادلی کاندیدا و بی ساواد قوجانین تاپماجاسی (طنز حکایه)

احمد جوادی- فرهنگ و ادبیات سئرویسی؛ گئچن گونلرده مجلس انتخاباتی نین تبلیغات زامانلاریندا کاندیدالاردان بیریسی تبلیغ اوچون قوشاچایین “یاغلان تپه” کندینه گئدیر. کاندیدانین طرف دارلاری کندین مچیدینه گئدیب و کند جماعتین مچیده دعوت ائدیرلر کی کاندید بی اونلارا دانیشسین. کند آدامی و آغ ساققالاری مچیده گلیب اوتورورلار گؤره لر بو عزیز کاندید نه لر دانیشاجاق. گومانکا او یامان سخن ور آدام ایمیش و مجلس دَده نئچه یول دانیشماغین چوخلاری اؤز گؤزلری ایله گؤرموشدولر.
چوخ اوزون گئتمیک دوستلار، محترم کاندیدا باشلاییر دانیشماغا و گئنه یالان دان پالان دان جورلییب دئییر کی من چیخسام بئله ایشلر گؤرجه یم، ائله ایشلر گؤرجه یم  کنده کارخانا گتیرَجه یم، دئیه جَیم کندین یولون اوتوبان ائله سینلر، یئر آلما-بادیمجانی خاریجه اؤلکه لره صادیر ائده جَیم و…باشقا تکراری بوش وعده لر. بو حالدا بو کاندیدا گؤرور کی بو نقدر ایستی و گوجلو دانیشسادا سؤزلرینین هئچ بیر تاثیری جماعتین صفتینده گؤرسنمیر و میللت بیر بیرینه تاپماجا تعریف لییب و دانیشیب گولمگه مشغولدولار.
کاندیدا بی فرصتی الدن وئرمک ایستَمیر و سیرتیق جاسینا اوزون قوجالارا توتوب دئییر ندن دانیشیرسیز منی ده اؤز جمعینیزه قوشون؛ قوجالارین بیری دئییر والله بیز سنین سؤزلریندن بیر شی آنلامادیق! بونا گؤره اَلیمیز بوش قالماسین دئیه بیر بیریمیزه تاپماجا تعریف لییب و بایاتی دئییریک آخی بیز سنه تای دوکتور مهندیس دئییلیک بیز بیساوادیق! کاندیدا بی بیرازدا سیرتیلیب دئییر بابام عیبی یوخ ساواد چوخ مهم دئییل منه ده بیر تاپماجا دئیین قویون منده تاپیم؛ قوجا کیشی دئییر عیبی یوخ بالام “او نه دیر هر دؤرد ایلده بیر یول گؤرسَنر؟ گؤرونن دَده یئمک اوچون گؤرسَنر؟
کاندید بی فیکیره جومیب و چاش باش قالیر؛ هافیکیرلشیر هو فیکیرلشیر بوش بئینینه بیر شی چاتمیرآما فیکیرلشدیک جه آلنیندان تر سوزولور. کند جماعتی ده دئییر تئز اول تاپ واختین توکنیر… کاندید بی بیرازدا فیکیرلشندن سونرا آنلاییر کی بو تاپماجانین جاوابی ائله اؤزودور. بئله لیکله قویروغون بئلینه آتیب سکوت ایچینده مجلسی ترک ائدیر.