گؤبه‌لَک فصلی گلدی!

گؤبه‌لیک - قارچگؤبه‌له‌یه گؤره چاربورج‌دا بیر اینام (باور)!

چاربورج کؤوشنینده یازدا یاخجی گؤبه‌لک چیخار. البته کی گرک گؤبه‌لک تاپماقدا لازیم تجربه‌ن ده اولا، یوخسا هر دیک و شیشن یئری دئشسن آخشاما کیمی یونجا کؤکو و خویولدان باشقا هئچ نه تاپا بیلمرسن. تاپدیقلارین دا حتما جین گؤبه‌له‌یی یادا قوواق گؤبه‌له‌یی اولار، کی آیدین-آشکار گؤرسنَر.

چاربورج‌دا قدیم زامانلاردان ایندیه کیمی یاز اولوب یاغیش یاغسا دا هر جیت باشینا گؤبه‌لک تاپماغا گئتمزلر. چونکی دئیرلر گؤبه‌لک چیخماسینا گرک گؤی گورولداییب و ایلدیریم شاخسین! یوخسا اوچ گون ده دالبادال یاغیش یاغسا گؤبه‌لک چیخماز. بو ایشین عیلّتی ده بودور کی گؤی شاققیلداییب، ایلدیریم شاخاندا گؤبه‌لک یئرین آلتیندا بو سَسی ائشیدیب دئییر یئرین اوستونه چیخیم گؤروم نه خبر وار. گؤبه‌لک یئرین اوزونه چیخاندان سونرا ایستیر یئرین آلتینا قاییدسین آما یازیقلار اولسون کی اونون باشینداکی بؤرکو قویماییر یئرین آلتینا قاییتسین! و بئله اولور گؤبه‌لک یئر اوزونده اسیر اولوب قالیر.

چاربورج کؤوشنی‌نین یاخجی گؤبه‌لک چیخان یئرلرین بیر نئچه‌سی‌نین آدینی آشاغیدا یازیریق حتما یاغیش یاغاندان سونرا بیر-بیر باش وورون: چیمن سووات – آلازایان – اسد چارداغی – جین قره – کوله قوبو اوستو.

کؤوشن: اکین یئرلری، آرپا-بوغدا اکیلمیش کند یئرلری
خویول: یاغلی تیکان کؤکو
جین گؤبه‌له‌یی: سمّی گؤبه‌لک
قوواق: قلمه، تبریزی
هر جیت باشینا بیر ایشی گؤرمک: چاربورج دئییمی، هئچ بیر اتفاق دوشمه‌میش بیر ایشی گؤرمک
کوله قوبو اوستو: چاربورج کؤوشنی‌نین بیر قیسمتی کی قدیم‌لر اوردا کیچیک (کوله) بیر قوبو (چوخور – تالاب) واریمیش.

بلکه بو یازی‌لاری دا سئوه‌سیز!

7 جاواب

  1. سلام . قارداش باغیر دلیکی یاددان چیخیب یازیلماییب 🙂

  2. Akbar گفت:

    من ایندیه قدر، بیر دانا دا گؤبه له تاپا بیلمه میشم! هئچ بالبخ دا توتا بیلمه میشم! هئچ فیشقیراخ دا چالا بیلمیرم!
    بو باشارسیزلیخ لارا گؤره، اوشاخلیخدان ایندیه قدر ساده جه حسرت! 🙁

  3. ahmad گفت:

    من چوخلو گؤبلک تاپمیشام و بالیق دا توتموشام آما فیشدیراق چالماق منیم ده اورگیم ده بیر حسرت اولوب! آما یقین بیلیرم کی بیرگون اونودا باشاراجیام

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

WordPress spam blocked by CleanTalk.