زیرناچی هنرمند، محسن مختاری: ایکی هفته زیرنا چالمایاندا مریض اولورام!

زیرناچی هنرمند محسن مختاریاوجاق سایتی فولکلوروموز و یئرلی موسیقیمیزی تانیتماق هدفی ایله قوشاچایین یایجان (یاریجان) کندیدن اولان زیرناچی هنرمند مؤوسون (محسن) مختاری ایله مصاحبه ائتمیش. آشاغی‌دا بو ماراقلی مصاحبه‌نی اوخویا بیلرسیز.

اوجاق: سلام، یورولمایاسیز مختاری جنابلاری لوطفا اؤزونوزو بیزه آرتیق تانیتدیرین.

سالام بیزدندیر. چوخ ساغ اولون. والله من محسن مختاری‌یم. میاندابین یایجان کندیندن و ایللر بویودور زیرنا، بالابان، و قوشا سیم سیم  سازلارین چالارام و چوخلو توی و مراسیم‌لرده حضوروم اولوب.

اوجاق: سایدیغینیز بو سازلارین (موسیقی آلت لرین) فرقی نه‌دیر؟

فرقی سس‌لرینده‌دیر. بیرده کی بالابانی ائو ایچینده سازینان و ال قوالی ایله چالارلار. قوشا سیم سیمی قولتوق دومبه‌یی ایله و زیرنانی آچیق فضادا بؤیوک قووال (قاوال) ایله چالارلار.

اوجاق: مختاری جنابلاری نئچه یاشینیز وار و نئچه ایلدیر موسیقی ایشینده‌سیز؟

والله منیم 72 یاشیم وار و 15 یاشیمدان بو ایشی باشلامیشام.

بو زیرنانی عیراقین موصول شهریندن آلمیشام کی اورداکی تورک‌لر بونا "چؤل سازی" دئییردیلر.

بو زیرنانی عیراقین موصول شهریندن آلمیشام کی اورداکی تورک‌لر بونا “چؤل سازی” دئییردیلر.

اوجاق: عؤمرونوز اوزون اولسون اینشاالله. بو یولدا اوستادینیز کیم اولوب و کیمدن بو سازلارین چالماسین اؤوگنیب‌سیز؟

دوزون دئسم چوخ اوستاد یانینا گئتمه‌میشم وچوخ اؤزوم چالیشیب اؤوگنمیشم. آما میاندابین حاج‌حسن‌کندی‌لی رحمتلیک اوستاد حیدردن چوخلو کؤمک‌لیک آلمیشام و او کیشی منیم اوستادیم اولوب.

 

اوجاق: نه سبب اولدو موسیقی‌یه اوز گَتیردیز؟

اوشاقلیقدان زیرنا بالابان چالماغا بیر خاص علاقه‌م واریدی. مخصوصاً زیرنا چالماق “اولفیه‌می”(روحیه‌می) دیریلدیر. موسیقی هامی اینسانلارا نیازدیر. آللاها آند اولسون قارداش اوغلو، تک ایکی هفته بو زیرنانی چالمیاندا مریض اولورام! بونا گؤره‌دیر تویلارا گئدیب زیرنا چالیرام، یوخسا منیم یایجان دا و حتی میاندآبدا چوخلو مولکوم یئریم وار و بونو پولونا گؤره چالمیرام. چون اصلا پولونا نیازیم یوخدور.

اوجاق: سیزی ساغ اولاسیز. زیرنا قووالین نئچه جوره هاواسی وار و سیز هانچی‌لارین چوخ سئورسیز؟

عرض اولسون کی زیرنانین چوخ هاواسی وار من بیلیب باشاردیغیم یوزدن آرتیق اولار. من سئودیییم هاوالاردا خالقیمیز سئوَن هاوالاردی، کی او جومله دن: بیر اوینا – اوچ تَپیک – بیریانه – ای وای دینمه – و سولدوزو هاوالارین سایماق اولار.

اوجاق: بیلیرسیز زیرنانی هاردا دوزَلدیرلر وبیزیم منطقه ده بئله بیر ایش گؤرن وار؟

فیکر ائله‌میرم میانداب ماحالیندا زیرنا دوزَلدن اولا. ایرانین باشقا یئرلرین‌دن ده خبریم یوخدور. من اؤزوم ده بو زیرنانی عیراقین موصول شهریندن آلمیشام کی اورداکی تورک‌لر بونا “چؤل سازی” دئییردیلر.

اوجاق: مختاری بی یادیمیزدان چیخمامیش بو یانیویزدا اولان قووالچی دوستوموزودا بیزه تانیددیرین.

بودا منیم عزیز دوستوم دوستعلی علیزاده میاندابین حاصیل‌قوبو کندیندَندیر و ایللر بویودور منیمله قووال چالار.

اوجاق: سیزین شاگیردیز ده اولور؟ یانی بیری ایسته‌سه زیرنا چالماغی اونا اؤوگدَرسیز؟

 زیرنا چالماق "اولفیه‌می" دیریلدیر. موسیقی هامی اینسانلارا نیازدیر. تک ایکی هفته بو زیرنانی چالمیاندا مریض اولورام!

زیرنا چالماق “اولفیه‌می” دیریلدیر. موسیقی هامی اینسانلارا نیازدیر. تک ایکی هفته بو زیرنانی چالمیاندا مریض اولورام!

 

والله دوزون دئسم قارداش اوغلو بویاندا زیرنا بالابان چالماغین اؤرگشمه‌یه جاوانلار چوخ ماراق گؤرستمیرلر، منیم اؤزومون 4 اوغلوم وارکی هئچ بیریسی منیم یولومو ایدامه وئرمه‌دی. آنجاق بیری ایسه‌تسه اؤوگشه من اونا اؤرگده بیلرم.

 

 

 

اوجاق: مختاری جنابلاری وقتیویزی چاربورجون اوجاق سایتینا قویدوغوزا گؤره من سیزدن چوخلو تشککور ائلییرم آرتیق سیزه موزاحیم اولمورام اگر آخیردا بیر سؤزونوز وار بویورون.

-من ده سیزدن و چاربورجون قان ایستی جاوان‌لاریندان تشکور ائلییرم کی همیشه بیز چاربورجا گلنده بیزه چوخ محبت ائلییللر. بونو دئمه‌لییم کی موسیقی اینسانین اولفیه‌سین دیریدیر. مخصوصا اصیل و سنتی موسیقی‌میزه چوخ ارزش وئرین.

اوجاق: چوخ ساغ اولون.

بلکه بو یازی‌لاری دا سئوه‌سیز!

6 جاواب

  1. جواد گفت:

    چوخ گوزل. منجه او هاوالاری ضبط ائدمک گرکیر. امانیزدا اولسا او هاوالاری اوز آدلاری ایله ییغیب یایینلاسیز.

    • ocaq گفت:

      دوغرودور، ساده‌جه بیر مصاحبه ایله بئله اؤنملی فولکلور سوژه‌لریندن گئچیلمه‌مه‌لیدیر. گئنیش توجه لازیم‌دیر.

  2. Akbar گفت:

    منجه بو سایتین فئیسبوکدا بیر سایفاسی اؤلسا، داها یاخجی اؤلار.
    سیزه باشاریلار.

  3. رشدیه گفت:

    مختاری جنابلارا سلامتلیق آرزو الیرم.
    چوخ دیرله و ارزشله گزارشیده.
    تشکرلار

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

WordPress spam blocked by CleanTalk.