چاربورج دا “صفر آشی”
صفر آیی اهل بیت(ع) اوچون آغیر و مصیبت لی آیلاردان بیری دیر. بو آیدا پیغمبریمیز و بیر چوخلو ایمام لاریمیز دونیادان کؤچوب لر. بونا گؤره چاربورج دا هرکیمین بو آیدا اوشاغی دونیایا گلسه اونا گؤره بیر مراسیم توتارلار. بو مراسیمین آدی “صفر آشی” مراسیمی دیر. بو مراسیم ده ائل-قوهوم تزه اوشاغی اولان آنا و آتانین ائوینه ییغیشیب و آش پیشیرمه یه مشغول اولارلار. کؤرپه نین قوهوم لاری او جمله دن بی بی لری ، خالالاری، عمی قیزلاری، دایی قیزلاری، بؤیوک آناسی و …بیر بؤیوک قازان آسیب و بو مراسیم ده اشتراک ائلرلر.
صفر آشی پیشندن سونرا اونو بالاجا کاسالارا چکیب و بوتون قاپی-قونشویا و تای تانیش لارا پایلارلار. صفر آشی مراسیم ینین جالب یئرلریندن بیری بودور کی بو مراسیمی اوشاغین آتا- آناسی هر ایل صفر آییندا تکرار ائلیَرلر. گؤرورسن بیر اوشاق بوی آتیب و 30 دان دا چوخ یاشی وار آما هئله ده صفر آیی گلنده اونون صفر آشین پیشیریب و پایلییرلار.
