دستَر؛ قدیم زامان‌لارین آرپا-بوغدا دارتما وسیله‌سی
نئچه ایل‌لر بوندان قاباق بو وسیله چاربورج‌لولارین ائوینده لاب چوخ ایشله‌نن و گؤزه گلن بیر وسیله ساییلیردی. چاربورج‌لو آنالار بو وسیله ایله بوغدالارین دارتیب و اونوندان چؤرک یاپاردیلار.
“اَل دَییرمانی” دئییلن “دستَر” و یا اؤز دئییمیمیز “دستَی” بؤیوک داش‌لاردان یونولوب دوزَلَرمیش. سونراکی ایل‌لرده چاربورجا برقین گلمه‌سی ایله بیرلیکده، بؤیوک دییرمان‌لار دا تیکیلیب ایشه باشلادیلار. بو سبب‌دن دستَردن استفاده گون به گون آزالدی و اونون مهم جایگاهی چاربورج‌لو خانواده‌لرین آراسیندا یاددان چیخدی.
عکس‌ده گؤردویوز بو دستَر چاربورج‌دا معدود قالان دستَرلردن‌دیر کی ایندی یارمالیق بوغدانی دارتماق اوچون استفاده اولور و نتیجه‌ده یارما حاصل اولور. بو دستَر اوزون ایل‌لردیر هله ده فیرلانماق‌دان یورولماییب! بونو فیرلادان چوخلو اینسان دونیادان کؤچوب گئدیبلر آما او هله ده فیرلانیر…
بو دستَر دیل آچیب دانیشسایدی گؤره‌سن گئچمیش گون‌لردن و یاشادیغی لحظه‌لردن نه‌لر دئیَردی؟
