محمد علی قولامپور(مشهد ممی) مرحمت آباد بؤلگه سینین بؤیوک بالابان اوستادی
محمد علی قولامپور 1310-جی گونش ایلینده کورد کندی کندینده آنادان اولموش و1383-جی ایلده وفات ائتمیشدیر. اؤزو و یاشیتلارینین دئدیگینه گؤره اوشاقلیق چاغلاریندا داوار اوتاراندا چؤلده اؤزونو یالنیز حیس ائتدیگینده سازاقلی نئی چالارمیش و هابئله آخشاملار چؤلدن كنده قاييداندا و قيشين اوزون گئجه لرينده كندين اهاليسي بير يئره توپلاناراق بالابان چالارميش و رحمتلي آشيق عبدالعلي بالكانلي دا اوخويارميش. اؤزونون دئديگينه گؤره بالابان چالماني بئداهي اؤيرنميشدير. اونون 25 ياشيندا اولدوغو زامان، رحمتليک آشيق اورفوللا(روح الله) كند ده بير تويا چاغيريلير و بورادا رحمتليک محمد علي قولامپورلا یاخیندان تانیش اولور و اونون بالابان چالماسيني چوخ بَينير و بوندان بري هر يئرده تويا چاغيريليرسا يانينجا اونودا بالابان چالماغا آپارير. بير آز مدت دن سونرا او بير باشاريقلي و آدليم بالابانچي اولور و آشيق اورفوللا دان باشقا رحمتليک آشيق باهار بالكانلي، آشيق ياحيا، رحمتلي آشيق حسن و… ايله بيرليكده بالابان چالميش و ايندي اونون بالابانينين سسي آشيق اورفوللانين “پري خانيم ايله قورباني” و آشيق حسنين “علي شاه ايله شهريار” دستانلاريندا ياشاياراق دينله نير. آما اينقلاب دا 1368-جي ايلده اونون اوغلونون تويونا ايكي گون قالان بالابانين كميته مامورلاري آليب سينديريرلار. بواولاي دان سونرا اونون الينه بالابان آلماسيني هئچ كيمسه گؤره بيلمه ميش دير. دئملي دير كي اينديكي مرحمت آباد بؤلگه سينده بو سون يوز ايل ده اوندان سونرا آيري بير داهی بالابانچي اورتايا چيخماميش دير.
“بیلال رحمتی”
بئله بیر دیَرلی صنعتچی لریمیز چوخ دور آزربایجان دا ،آما تأسسفله موسیقییه بیر تفنن گؤزیله باخدیغیمیزا گؤره ،صنعتچی لریمیزین آدلاری یادلاردا قالیب، هرحالدا بو بالابانچی اوستامیزین روحو شاد.
دوزدور بی. بلکه ده بیر گون مرحمت آباد بؤلگه سینده جانلی بالابان سسینه حسرت قالدیق. بو بؤیوک نفس لر یاتدیقدان سونرا یئرلرینه بیر آیری جاوان بالابان چالان یارانمیر.
یاخشی دئدین بی،اوجور کی گؤرونور بیر جانلی بالابان سَسینی دینله مک بیزلر اوچون بیر حسرت اولاجاق.اومید ائدیرم گنج لریمیز بو حسرته قارشی قدم گؤتورسینلر.