“سو”یون مقدس اولماسی بارَده چاربورج دا ایناملار

سو چاربورج خالقینین ایچینده صافلیغین و پاکلیغین نمادی دیر. سو بیر جانلی موجود کیمی احترام و منزلت صاحبی دیر. سو برکت و یاشاییش سیمگه سی دیر. چاربورجلو آتا-آنالارین اینامیندا هرکیم یوخودا سو گؤرسه حتما اوغورلو و یاخجی بیر اتفاق لار اونا توش گلَجک. اگر بیر نفر سودا ایسلانسا یا الینده کی سو بارداغی آشیب سویو جالانسا اونا هئچ ناراحت اولمازلار چونکی دئیرلر “سو آیدینلیق دیر” بونا گؤره چاربورج خالقینین ایچینده هر ایل چرشنبه آخشامی “سو سَپمک آدیندا” بیر مراسم گئچیریلیر. بو مراسیم ده چاربورج خالقی بیر بیرینین اوستونه سو آتیب ایسلادارلار. بو مراسیمین اعتقادی ریشه لری بوندان عیبارتدیر کی چرشنبه آخشامیندا هرکیمین اوستونه سو آتیلسا او شخص گلن ایله کیمی مریض اولماز و همیشه ساغلام یاشار. تورک خالقلارینین ایچینده بئله لیکله حایاتین دؤرد اصلی عنصرلارینین(سو، اود، تورپاق و یئل) مهم بیر جایگاهی وار و هر ایل تورک خالقلاری او جمله دن آذربایجان خالقی یاز گلنده بو عنصرلارین آدیندا فلسفی و آیینی مراسم لر گئچیرَرلر. سو چرشنبه سی، اود چرشنبه سی، تورپاق چرشنبه سی، و یئل چرشنبه سی بو مراسم لردن عبارتدیر. بو مراسیم لرین هر بیریسینین اؤزونه مخصوص اولان دب لری و عادت لری وار. بوندان علاوه چاربورج خالقینین ایچینده آخار سویا میندار آتماق چوخ پیس بیر ایش تانینیر و هر کیم بو ایشی گؤرسه تانرینین یانیندا بؤیوک بیر گوناه صاحبی اولور. آما بو گوناهی یوماق یولودا وار اودا بودور کی سویا میندار آتان آدام گرک دیر کیرپییندن بیردنه یولوب سویا آتسین تا بئله لیک له تانری اونون گوناهین باغیشلاسین! بو اینامین عیللتی و ریشه سی ندن اولور اؤزو بیر آیری آراشدیرما(تحقیق) ایستَییر.