دونن، کَت استیونس(Cat Stevens) بوگون، یوسف ایسلام(Yusuf Islam).

photo_2016-04-25_21-55-02

استیفن دیمیتری گئورگی 21جولای 1948_جی ایلده لندن شهرینده آنادان اولور. اونون آتاسی یونانلی، آناسییسا سوئدلیدیر.او، 8 یاشیندایکن آتا_ آناسی بیر_بیریندن بوشانیرلار.
استیفن عائله نين اوچونجو اوشاغیدیر. آنیتا آدیندا بؤیوک بیر باجیسی و دیوید آدیندا بیر قارداشی وار. اونلار رستوراندا بیرلیکده چالیشیردیلار. استیفن دیمیتری ، کت استیونسه عائله سی طرفیندن قویولان آددیر. استیفن دیمیتری موسیقی ساحه سینده دونیا شؤهرتی قازانديقدان سونرا کت استیونس آدینی اؤزونه سئچدی.آما بو آد اونون اؤزونه سئچدییی سون آد اولماییر. کت استیونس 19یاشیندایکَن بیرینجی آلبومونو یایینلاییر و بو آلبوم اینگیلیستاندا یوکسک سَوییه ده آلینیر. بیر حالدا کی، اونون ایکی ماحنیسی اینیگلیستانین اون اوستون ماحنیلارینین ایچینده یئر آلیر.
کت استیونس_ین آلبوملارینین 25میلیوندان آرتیق کُپیالانیب، ساتیشا گیرمه سی ،اونو موسیقی دونیاسیندا بیر سوپر استارا چئویریر.کت استیونس پاپ و راک سبک’لرینده اوغورلا یولونا دوام ائدركن، 1969_جو ایلده سِل خسته لييينه یاخالانیر.
خسته لييينين گئتدیكجه آغیرلاشدیغینا گؤره ، دوکتورلار آرتیق اونون ساغلامليغينا قاووشماسيندان اومیدلرینی کَسیرلر. بیر ایله یاخین درمان اولدوقدان سونرا شفا تاپیر، یئنه ده موسیقی ساحه سینده چالیشمالارینی باشلاییر، آما بو دفعه باشقا بیر روح و ایچینده یارانان بام باشقا حیسلرله.
اونون «زارع» آدلی آلبومونده، «وحشی دونیا» و «آتا و اوغول» آدلاریندا اولان یازدیغی ماحنیلار، اونو آمریکانین یئرلی موسیقی ساحه سینده بیرینجی موسیقیچی كيمی تانیتدیریر و قیزیل هئيكل اؤدولونو قازانير.
بو آرادا کت استیونس دینجلمه زامانینی مراکش_ده کئچیردییی زامان، اذان سسینی دینله ییر، اونا اذانی آللاه اوچون موسیقیدیر دئيه آنلاتمیشلار. کت استیونس اذانی دینله یَرکَن اؤز_اؤزونه دئییر: من ايندييه قده ر بوتون شهرت و پول قازانماق و اؤزه ل اینسانلارا خطاباً موسیقی دینله میشدیم، آما آللاها خطاباً هئچ نه دینله مه میشدیم. بو سؤزلر، کت استیونسو آللاهی دریندن دوشونمه یه یؤنلدير.
1976_جی ایلده استیونس کالیفرنیا شهرینین مالیبو ساحيلینده اوزمه یه گئدیر، اوزَرکَن وسوسه اولور و دنیزین دَرین یئرلرینه چاتیر. بیر آن اورتادا اولدوغو زامان اؤزونو یورغون حیس ائدیب، گئری دؤنمه یه چالیشیر آما اوزمَک اوچون گوجو اولماییر. بیرآن اؤزونو دنیزده بوغولموش کیمی گؤرور، او لحظه اوره یینده دئییر کی:
“Oh, God! if you save me I will work for you.”
ائی آللاهیم! منی بو دورومدان قورتاریرسان اگر، بوندان سونرا سنین اوچون چالیشاجاغام.
بو سؤزدن سونرا کیچیک بیر دالغا، آرخاسیندان دا بؤیوک بیر دالغا گلیب استیونسو ساحیله یاخینلاشدیریر واستیونس گوجله نیب اؤزونو قورتاریر.
استیونس بو معجزه دن سونرا دینلری آراشدیریر. استیونسین بؤیوک قارداشی دِیوید بیت المقدس سفریندن اونا بیر جلد قرآن پای گتیریر. استیونس قرآنی اوخودوقدان سونرا، بوتون سورولارینین جاوابینی اوندا گؤرور. استیونس 1977_جی ایلده لندن شهرینده مسجدلرین بیرینده رسما اسلاما اوز گتیریب، مسلمان اولور. استیونس یوسف سوره سیندن داحا چوخ تاثیر آلدیغی اوچون، حابئله اوشاقلیق ايللريندن یوسف آدینین اینگیلیس دیلینده معادلی اولان جوزِف آدینی سئودییینه گؤره آدینی یوسف ایسلام قویور. کت استیونس آدیندا ایستادیومدا سِن اوسته گئدیر و یوسف ایسلام آدیلا ایستادیومدان چیخیر. همان ایلده فوزای علی بیر مسلمان خانیملا ائوله نیر، ایندی ايسه 5 اوشاقلاری وار.
یوسف ایسلام بوتون گیتارلارینی خیریه موسسه لرینه باغیشلاییر، موسیقینی گئچیجی اولاراق بوراخیر، اینسان سئورلیک و خیریه ایشلریله مشغول اولور. اینگیلیستان_دا اَن بؤیوک و اعتیبارلی اسلام و مدنیت مدرسه سینی قورور. یوسف ایسلام باریش آدییلا، 2007_جی ایلین آوریل آییندا هامبورگ شهرینده اونلو «آئول آرنا» ورزشگاهیندا 80مین دینله ییجییله کنسرت کئچیریر و اورادان قازاندیغی پوللاری خیریه مؤسسه لرینده قوللانیر. مسلمان اولدوقدان سونرا یوسف ایسلامین اَن پارلاق آلبوملاری بونلار اولوب:1_باریش قاطاری 2_یالنیزلیق آللاها عائیددیر 3_طالع البدر علینا 4_ I look I see (باخیرام گؤرورم).
یوسف ایسلام بئله دئيير :”مسلمانلاری تانیمادان اؤنجه قرآنی تانیدیم، اؤنجه مسلمانلاری تانیسایدیم اگر ، هئچ بیر زامان مسلمان اولمازدیم”.
یوسف ایسلام مختلف عنوانلاردا تکرار صلح اؤدولونو قازانیر. اونون اَن اونلو اؤدولو
«آیورنوولو»اولموشدور. ایندی ايسه دونیانین اَن بؤیوک خیّر و هومانیست فعاللاریندان بیریسیدیر.

 

بلال رحمتی؛ دوشونجه و فیکیرلر سئرویسیphoto_2016-04-25_21-58-21

بلکه بو یازی‌لاری دا سئوه‌سیز!

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

WordPress spam blocked by CleanTalk.