چاربورج‌لو آشیق داریوش سلطانی ایله مصاحبه!

داریوش سلطانی چهاربرجاوجاق: سلام داریوش بَی یورولمییاسان، کئفین نئجه‌دی؟
چوخ ساغ اولون. آللاهین درگاهینا مین شوکور یاخجیام سیز نئجه سیز؟

اوجاق: بیز ده واریق، دوستلار ساغ اولسون. داریوش بی بیزه بیراز اؤزوندن دانیش و نَجور اولدو ساز چالماغا باشلادین؟
واللاه علاقه‌م واریدی کی ساز چالماغا باشلادیم. ساز چالماق منه آرامش وئریر و هر زامان داریخاندا ساز چالماق داریخماغیمی داغیدیر.

اوجاق: داریوش بی بو چالدیغین سازین آدی نه‌دیر؟ قیلیق‌دان باغلامایا اوخشاییر آما سسی قوپوز سسی‌دیر؟
بو باغلامادیر! آما سیم‌لرین دئییشیب قوپوز (آشیق سازی) سیمی سالمیشام!

اوجاق: بو ایشی ندن گؤرموسن بلکه تزه بیر موسیقی سبکی آختاریرسان؟
یوخ بابام! سسی اوره‌ییمه یاخجی یاتمیردی. حتی بو سازین پرده‌لرین ده سؤکوب اؤزومدن قاتما (ایپ) ایله آیری پرده قوشموشام!

اوجاق: تانری یامان گؤزدن ساخلاسین! بیر باشا اوستاسان ماشاللاه
خواهیش ائلیرم. منیم بوجور ایشیم چوخدور. چوخ زامان سو ماتورون (موتورون) سایپا وانت‌ین موتورونون یئرینه  قوشوب سورموشم! بئله بیر ایش‌لره علاقه‌م وار و ایستیرم اؤزومدن بیر ایش یارادام.

اوجاق: ایش‌دن دئدیز، دوغوردان نه ایش گؤرَرسیز و اقتصادی چالیشماغیز نئجه‌دیر؟
ایندی کندلرده پای-پالتار و قاب-قازان ساتیرام، قاباقجالار شابانلی‌دا بیر مکانیکی توکانیم دا واریدی آما خوشوم گلمه‌دی، ییغیشدیردیم.

اوجاق: داریوش بی شخصی یاشاییشین نه دورومدادیر، ائولی‌سیز یا سوبای؟
من ائولی‌یم و بونو دئمه‌لیم کی منیم ایکی آروادیم و بیر دنه ده قیزیم وار کی آدی سارادیر.

اوجاق: آللاه یامانلیق وئرمه‌سین. قیزیوین نه گؤزل ده آدی وار. نه سبب‌دن سارای آدین قیزیوا قویدون؟
واللاه بیر گون بیر هندی فیلمه باخیردیم، اوردا بیر غیرتلی قیز واریدی کی اَرینه گؤره جانین وئردی. او قیزین آدی سارا ایدی و اونون غیرتلی ایشیندن چوخ خوشوم گلدی و آدین قیزیمین آدینا قویدوم.

اوجاق: من فیکر ائله‌دیم خان چوبانین ساراسینا گؤره بو آدی سئچمیسن! آما نئینک فرقی یوخدور. بیزه دئیه بیلرسن دونیادا لاب سئودییین شئی نمنه‌دیر؟
دونیادا لاب سئودیییم شئی بیر دنه باهالی باغلاما و بیردنه ده باهالی ویولون‌دور! قیمت‌لرین ده اؤرگشمیشم اون میلیون تومن‌دیر. کئفیم ساز اولسا اینشاالله اونلاری آلاجییام.

اوجاق: اینشاالله. دونیادا نه‌دن چوخ آجیغین گلر؟
بیراز پول قازانیب اؤزونو قورو توتماقدان! پول و مال-دولت چوخ پیس بیر شئی‌دیر. اگر باعیث اولا اؤزونو آیری اینسانلاردان فرقلی گؤره‌سن. اینسان یارانیب بیر-بیری ایله برابر ارتباط قویسون آما چوخ زامان پول باعیث اولور بو ارتباط قورولماسین و بیر طرف اؤزون چوخ یوخاری‌دا گؤرسون. هله  آیری آدامینان ایشیم یوخ. منیم اؤزومون بیر زامان اوچ ته‌یرلی موتوروم (سه چرخه) واریدی. اوندا ایندیدن آلچاق کؤنول (متواضع) بیر آدام ایدیم و ارتباطیم دا جماعتی‌نن چوخ یاخجی ایدی، ایندی‌دن کی پیکان وانت آلمیشام.

اوجاق: دوغوردان گؤزل بیر دوشونجه‌ن وار. داریوش بی. دئییرلر سنین چوخ شیرین و گولمه‌لی خاطیره‌لرین وار، اونلاردان بیرین بیزه و اوجاق سایتی‌نین اوخویان‌لارینا تعریفلییه بیلرسن؟
منیم باشیم اوسته. بیرگون کلیبر’ین کندلرینده آل-وئر ائلییردیم. بیردن بیر قیرمیزی ایلان قاباغیما چیخدی. من تئز ماشین‌دان توشوب ایلانی توتدوم و اؤزومونن منزیله آپاردیم. منزیل‌ده بیر کلبَتین گؤتوروب ایلانین دیشلرینی چکدیم! آغزین پانسمان ائله‌ییب ایلانی اؤزومه بیر یولداش کیمی ساخلادیم. بیر گون ایلانی جیبیمه قویوب ماشینیملا یولدا گلیردیم. بیردن بیر پلیس ماشینی منی ساخلاتدیردی و ایچیندن بیر افسر دوشوب مندن مدارک ایسته‌دی. من ده الیمی جیبیمه سالدیم مدارک‌لری چیخاردام قاریخیب ایلانی چیخاتدیم!  یازیق افسر ایلانی گؤرَن همین الینده نه‌یی وار یئره آتیب قاچماغا باشلادی…

اوجاق: داریوش بی ایندی بو گولملی خاطیره‌نین دالی بیر آغیز چالیب اوخوماق چوخ یاپیشار. بیزه بیرین اوخویا بیلرسیز؟
دوزون دئسم من یاخجی آواز اوخویا بیلمیرم. فقط سازی چالیب شعر اوخویارام. سیزه ده اؤزوم قوشدوغوم بیر شعر حاضیرلامیشام کی تقدیم ائلییرم
**داریوش بی بو شعری اوخومامیشدان قاباق بیزه دئدی کی نه سبب اولدو بو شعری یازدیم. او دئییردی کی بیر گون جلال جابری ایله بیراز دانیشدیم و اونون غم‌لی کئچمیشی و خاطره‌لری باعث اولدو اورکدن جوشام و بو شعری یازام و بو شعری دوستوم جلال جابری یه تقدیم ائلییرم.**

جلال جابری چهاربرج

داریوش بی‌ین سئویملی دوستو، جلال بی.

من ده عاشیق‌لر ایچینده سارالیب قددیم اَییلدی
چؤووب آغلیم دا باشیمدان، منه دیوانه دئییرلر
او قدَر بختیم اؤلوبدور منه یاردان دئمییرلر
من اؤزوم خیردا قیزیدبم آنا دونیادان گئدنده
آنا گئتدی اوزو توپراغه یئتیشدی
من ده قالدیم… کندده (کَدده) اوتاقلار بوجاغیندا
ساوالان کندی‌نین “گولچه” اوجاغیندا
دده‌دن هم ننه‌دن، منه وار قالمیشیدی تکجه تویوق!
او دا جان وئردی آجیندان قوجاغیمدا
یئتیشیب قاره گئییندیم دده‌مین گول اوجاغیندا
آخیر بیر من ده قوجالدیم نئجه کندلر بوجاغیندا…

بوشعری یازا یازا  بیر دن قفیل یئل کیمی، باجاناقیم ایچری تَپیلدی و من مجبور اولدوم کاغاذ قلمی ییغیشدیرام و شعریم یاریمچیلیق قالدی…

 

اوجاق: یامان حئییف اولوب. دئییردیلر باجاناق‌دان قوهوم چیخماز بیز اینانمیردیق. یوخسا بو شعرین دالی اولسایدی ادبیاتیمیزدا بؤیوک بیر انقلاب یاراداجاغیدی. هر حالدا داریوش بی وقتیزی اوجاق سایتینا قویدوغوزا گؤره سیزدن چوخ تشکَور ائلییرم.  گون او گون اولسون کی بیر بؤیوک ویولون و باغلاما چالان اولاسان.
ساغ اولون. منده سیزدن تشکّور ائلییرم. گَنه منه باش وورون.

بلکه بو یازی‌لاری دا سئوه‌سیز!

4 جاواب

  1. فتاح گفت:

    از عکسهای قدیمی خیلی خوشم امد

  2. آصف گفت:

    من برادرداریوش سلطانی هستم امشب که اتفاقی این مصاحبه شمارادیدم بابرادرم حدودانزدیک دوسال هست که ازاین دنیارفته ..بااین مصاحبتون ماهم یه تلنگری بگذشته زدیم ک برامون بهترین شب شد..ممنونم ازشمادوستان…یاعلی

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *