چاربورج اصطلاح‌لاری: بره‌نی سووا (سویا) وئرمک!
سو سووارماق ایشینده چاربورج‌دا آز-چوخ هامینین تجربه‌سی وار. سوواردیغین یئر پندام اولاندا لاب دوزو آدامین دده‌سی یانیب گلیر گؤزونون قاباغینا. سو دهنه‌ده شیشیب پاتلاییر سن ده کی گرک قویمایاسان بره‌نی سو آپارسین. آرخین اوستونده گرک چپیش کیمی زئی‌زایی گئده سن. بونا گؤره ده بالا چاربورج‌دا رحمتلیک مشد عزیز سو سووارماغین چتین اولماسینا دئیَردی: سوچولوق دئییل اووچولوق‌دور! آما گاهدان دا سوواردیغین یئر خشوو اولور، اوندا تکجه ایشین سویو زامانیندا توتوب تحویل وئرمه و بیر ایکی آغیزلیق آچیب باغلاماق‌دیر. اگر بره‌بسدین یاخجی اولسا یئرین سو ایچن زامان حلبی‌نی اودون اوسته قویوب بیر قوش یوخوسو دا وورا بیلرسن. البته اگر مازارات آدام دؤورنده اولمالسا!
هن دوستوم یاشاییش دا بئله دیر. گاهدان آداما پندام اولور گاهدان دا خشوو. اونداکی دونیا پندام اوزون بیزه گؤرسَدیر گرک چالیشماغیمیزی چوخالدیب، بره‌نی سووا وئرمه‌یک چونکی سو همیشه دولو دهنه گلمز و یئریمیز ده همیشه خشوو اولماز!
- پندام: سطحی آرخین سویونون سطحیندن اوجا اولان یئر
- خشوو: سطحی آرخین سویونون سطحیندن آلچاق اولان یئر
- دهنه: نهر، اینسان اَلی ایله قازیلمیش سووارما چایی
- زئی‌زایی گئتمک: چاربورج دئییمی، عاجیزجه اویان بویانا سورونمک
- آغیزلیق: سووراما اصطلاحی، سویون کئچدیگی یئر
- بره‌بسد/بره‌بست: بره‌لرین باغلاماسی، بره‌لرین دوزَن و ترتیبی
- حلبی: چاربورج‌دا چای‌نیک’ه (کتری) دئییلیر.
- مازارات آدام: زیان وئرن آدام، خیرسیز آدام
بابا چؤخ گؤزل و دیرلی سایتیز وار، یانی چؤخ شاشکین قالدیم بااااااااا
آمما بیر سوآلیم وار، ندن چاربورج یازدیغینیزی باشا دوشمه دیم. من بیلدیغیم قدر، بو بؤلگه، تورکجه میزده و البت کی تاریخیمیزده چایبؤش آدلانیب!
آمما گینه سیزدن تشککور ائدیب و باشاریلار دئییرم.
چوخ ساغ اولون اکبر بی. سیزین کیمی ایزله‌ییجی‌لرین کؤمکی و ایش‌بیرلیگی ایله داها دا باشاریلی اولماغی آرزولاییریق.
آما چاربورجون آدینا گؤره دئمه‌لی‌ییک کی قضیه بیراز گئنیش‌دی. مختلف دیل، ائتیمیولوژی (ریشه شناسی) و … دلیل‌لرینه گؤره چاربورج آدی لاب یوخاری دوزلوک احتمالینا صاحیبدی. بو یاخینلاردا بو حاقدا بیر قاپساملی مقاله یایاجاییق.
تشکرلر
salamlar . Çarburca görə bir qapsamlı məqalə yazılsa çox yaxşı olar . çoxuna bu qonu qaranlıq qalıb
Dəqiqən sizin kimi düşünürük Vəhid bəy. Bu yaxında yerinə yetirəcəyik.
چوخ گوزل
هاریکا سان
بیر دنه سن
چوخ ساغول
نچه ایل ایدی گتمیشدیم شهره داها بو اصطلاح لاری اشیتممیشدیم
یاشا