قدیم زامانلاردان چاربورج‌دا ایش-پئشه‌لر (شغل‌لار)

فرش توخویانلار -چاربورج - چهاربرجآشاغی‌دا چاربورج‌دا قدیم زامانلاردان اولان بعضی ایش-پئشه‌لرین آدی گلمیشدیر. بونلارین بیر سیراسی اساسی و دائمی شغل، بعضیسی ایسه ایکینجی شغل و یا بعضن بیر اصلی شغلون زیرشاخه‌سی حساب اولونا بیلر.

بویاقچی: رنگرز

پینه‌چی: باشماقچی

آل‌وئرچی

ایشچی: قره فَهله

اکینچی

چوبان

ناخیرچی

چودار: مال آل‌وئری ائدن. رحمتلیک مشهد حاج آغا، حاج عابی (عبدالله) و حاج خوداقولو چاربورجون یاخجی چودارلاریندان ایمیش‌لار.

توکانچی: رحمتلیک حسن توکاندار و میر فضل الله چاربورجون لاب قدیم توکانچی‌لاری ایمیش‌لار.

سودچو: جمع آوری شیر

چَرچی: تزه‌قالالی تای قولاق چرچی قدیم زامانلار چاربورجا چوخ گلرمیش

داوارچی: چاربورجون شاغی طایفالاری‌نین ایشی داوار ساخلاماق‌دیر کی ایندی ده چوخو بو ایشده‌دیرلر

ساتیجی

اکینچی - قوربان عمی

اکینچی، قوربان عمی

چؤرک‌چی: شاطیر

باخیجی: سنتی طب‌دن باشی چیخان و طالعه باخان

سینیق‌چی: چاربورج‌دا اوچ بؤیوک سینیق‌چی وارایدی کی آللاه رحمتینه گئدیبلر: رحمتلیک عزیز عمی – رحمتلیک مشهد علی عمی- و رحمتلیک حاج رحمت الله، روح لاری شاد.

کوره‌چی

آراباچی: ایندی، داشقاچی – تیراختورچو – تیرتیرچی

فرش‌چی

دمیرچی: رحمتلیک عبدالصمد چاربورجون قدیم دمیرچی‌لریندن ایمیش

دووا (دوعا) یازان: دئییرلر سئید داوود دا دوعا یازیر!

سوچو: سو سوواران

گودوک‌چو / کئشیک‌چی: نگهبان، کندین خرمنین، مال-داوارین اوغورو آپارماسین و یا سو سوواراندا بره‌سین آچماسینلار دئیه کند آدامی گودوک‌چو استخدام ائلرمیشلر. رحمتلیک محرم و رجب عمی قدیم زامان‌لار بو ایشی گؤررمیشلر.

اونچو: اونچو رحیم چاربورجون آدلیم اون ساتانلاریندان ایمیش

چاپیجی: ناجاق ایله آغاج چاپان

چَکیجی

گتیرجی

درگازچی: درگاز (درگز) ایله یونجا و تاخیل بیچن

قوروق‌چو: کند آدامی‌نین طرفیندن مسئول ایمیش کی قویماسین بیر نفر آیریسی‌نین چؤلونه و یئرینه زیانلیق ائله‌سین و مال داوار اؤتورسون. قوروق‌چویا کند آدامی هر آی پول ییغیب وئرردیلر

بیچین‌چی

آلماچی

آغاش‌چی (آغاج چی): قوواق آل وئرینه باخان، رحمتلیک بایات عمی چاربورجون قدیم آغاشچی‌سی ایمیش

آیی اوینادان: معرکه گیر

چوبان عمی

چوبان عمی

خیبره: یئر آلیش وئریشینده قیمت تعیین ائدن، حاج ابراهیم قوروق‌چو چاربورجون آدلی سانلی خیبره‌سی (خیبله‌سی) ایمیش.

قووالچی: قووالچی عوض چاربورجون مشهور قاوال چالانلاریندان ایمیش

قره‌چی: قره پالتارلی طالعه باخان و فال توتان خانیم‌لار کی قدیم زامانلار چاربورجا گلیب و اؤزلری ایله مینجیق و اَل قاوالی دا گتیریب ساتاردیلار

شیکارچی: چیراق عمی و میرعلی اکبر عمی قدیم زامانلار چاربورج دا شیکارچی‌لیق ائدردیلر

یازیچی (میرزه): میرزه محمود (ماحمید)، مشهد مصطفی آغا رحمتلیک‌لر چاربورجون قدیم یازیچی‌لاریندان ایمیش‌لار

کبین کسن: قدیم زامانلار چاربورج‌دا رحمتلیک حاج میر حسن آغا و قیپچاق‌دا میرزه کبیر آغا کبین کسرمیشلر

جوت‌چو: اؤکوز ایله یئر سورن

قیچی پیچاق ایتیلدن: شَمی (شمس الله) عمی بو ایشی گؤرنلردن اولوب

نفت‌چی: محمد عمی، محمدحسین عمی و سادات‌قولو عمی چاربورجون قدیم نفتچی‌لریندن ایمیش لر

کؤمورچو

حامام‌چی: رحمتلیک حاج حمید عمی‌نین بیر حامامی واریدی کی 50 ایله یاخین قدمتی وار. بو حامام ایندی ده چاربورج‌دا قالیر و او اولدوغو خیاوانا خالق ایچینده حامام خیاوانی دئییرلر. حامام خیاوانی چاربورجون 4 اصلی خیابانیندان بیری‌دیر.

سوواق‌چی: داملارین اوستونه مهارت‌له سوواق یاخان

چیم کسن: قالین چمن یا چایی گؤیَـرَن یئردن بؤیوک اؤلچوده بئل ایله کسیب ساتارمیش‌لار. چیم‌لر ایله چاربورج‌دا ائو قویارمیشارلار

چالقی‌چی

دییرمان‌چی: چاربورج‌دا اوچ مشهور دییرمان واریدی. بیری چَرَجَلی دییرمانی، حاج حسن دییرمانی و بیری ده قیپچاق یولونون اوستونده کی بَی بابا دییرمانی

تندیرچی: اَت پالچیغیندان مهارت‌له تندیر دوزلدیب ساتارمیش‌لار. عدیله خالا، راضیه خالا و رحمتلیک خوشو (خوشقدم) خالا چاربورجون مشهور تندیرچی‌لریندن ایمیش‌لر.

چروَدارچی: بیری اوچ-دؤرد دنه اولاق، قاتیر، و آت ایله کرایه یوک آپارارمیش

بویوندوروق‌چو: جوتون اوستونده اوتوروب و اؤکوزلری هدایت ائدن

داشقاچی عمی

داشقاچی عمی

دولگایلیق (نجاری): رحمتلیک موسی و رسول عمی چاربورجون قدیم دولگای‌لاریندان ایمیش‌لار

جارچی: کندین مخصوص اطلاع رسانی. جارچی‌لار چاربورج‌دا او جمله دن توی، یاس، بیچین و بندی (جیغاتی اوستونده‌کی بند) باغلاماق خبرلرین خالقا چاتدیرارمیش‌لار.  رحمتلیک پئیکار رحیم  و نبی عمی بو ایشی گؤررمیش‌لر. جارچی ‌ارین جار چکمه‌سیندن بیر اؤرنک (مثال): صاباح ائودن بیر آدام بنده گئده‌جک هوی ی ی ی ی ی ی. صاباح جمشیدین اوغلو مالیت (مالیات) ییغاجاق هوی ی ی ی ی ی…

یونجا دوغرویان: بو ایشین مخصوص بیر ابزاری وار کی آدی دَهره‌دیر. رحمتلیک بهمن عمی و صفر عمی چوخ باجاراقلی یونجا دوغراردیلار

اوخوجو: چوبانعلی آدلا چاربورج دا مشهور بیر اوخویان وار ایمیش کی قاپی‌لاری گزیب، اوخویوب و عوضینه خالق‌دان چؤرک آلارمیش. دئییرلر چوبانعلی اوخویاندان سونرا چورک وئرن اولماسایمیش دئیردی تئز اول اوخوماغیمی وئر!

توخوجو: اؤزگه‌لره فرش توخویان

قفه‌چی (قهوه‌چی/چایحانا): چاربورج‌دا رحمتلیک سعید قفه‌سی، آللاه قولو قفه‌سی و علی آغا قفه‌سی چوخ آدلی و سانلی‌دیلار

دللک (سلمانی)

بلکه بو یازی‌لاری دا سئوه‌سیز!

6 جاواب

  1. ahmad گفت:

    بو داشقاچینین آدی ایوب عمی دیر

  2. رشدیه گفت:

    چوخ دیرلیده ocaq.
    آفرین بر همت والای آذربایجان.یاشا

  3. ocaq گفت:

    ساغ اولون رشدیه بی

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

WordPress spam blocked by CleanTalk.