كاش اولايدی كيمسه يالقيز قالماسين – توحید قنبری’دن بیر شعر
قوشاچایلی شاعیر توحید قنبری چوخ دَرین دویغولو و دوشونجهلی شاعیریمیز 1367-جی گونش ایلینده قوشاچای’ین (میاندوآب) “بشیرخان” کندینده دونیایا گؤز آچیب. توحید اورتا (متوسطه) تحصیلاتین قوشاچایین نمونه دولتی مدرسهسینده بیتیریب سونرا اورمیه دانشگاهیندا (بیلیم یوردوندا) درسینه ادامه وئررکن، لیسانس و فوق لیسانسین برق رشته سینده آلیر. تورک ادبیاتی ساحهسینده چالیشان بو شاعریمیز ایندی ایسه همین اورمو دانشگاهیندا دکتری اؤیرنجیسیدیر (دانشجوی دکتری). توحید’ین مذهبی گونلرده اؤزللیکله محرم آیی گلنده چوخ گؤزل بیر چالیشمالاری اولور. توحید دانشگاهدا مال-داوار قوربان کسیب، اَتینی دوغراییب، قازان آسیب و 6-5 یوز نفره امام حسین شورباسی پیشیریب پایلاییر. توحید مکهیه ده گئدیب.بولارا خاطیر اورمیه دانشگاهیندا هامی تورکلر توحید’ه “حاجی” دئییرلر. آشاغیدا گلن شعر توحید’ین شعرلریندن بیر نمونهدیر:
كاش اولايدي كيمسه يالقيز قالماسين
كيمسه دار گونده آدامسيز قالماسين
كاش يئتردی هامی انسانيّته
” ظولم”، “تكليک”، “فقردن” ايز قالماسين
كاش اولايدی كيمسه يالقيز قالماسين
هئچ كيمی آللاه گؤزوندن سالماسين
كاش محبت خرج اولايدی پول يئری
هامی دوستدان باشقا بير زاد آلماسين
كاش اولايدی كيمسه يالقيز قالماسين
هئچ گلستان باغ سوسوزدان سولماسين
كاش کی هئچ میلّت اسارت چكمهسین
هئچ وطن…، توپراق… ايكي پارچالماسين
كاش اولايدی كيمسه يالقيز قالماسين
آيريليقدان غمدن هئچ ساز چالماسين
كاش بيلردی هامی سئوگی قدرينی
هئچ كيمين ياری وفاسيز اولماسين
كاش اولايدی كيمسه يالقيز قالماسين
اؤز ائوينده هئچ كيشي آلچالماسين
هئچ آنانين باشی اوستو كؤلگهسيز
هئچ اوشاقلیق گؤزلره ياش دولماسين.