جین توتان فرج عمی‌نین حیکایه‌سی

جین توتان فرج عمی - چهاربرج

بیر چاربورج‌لو اکینچی باغلیق ائشمک حالیندا

قدیم زامانلار چاربورج‌دا رحمتلیک فرج عمی آدیندا بیر هوشلو-باشلی و دوشونجه‌لی اینسان یاشاییرمیش. فرج عمی چوخلو چاربورج‌لولارا تای اکینچیلیک ایشینه باخارمیش. او سحر تئزدن چؤله گئدیب اوت-یونجا بیچیب، باغلاییب ائولرینه گتیررمیش. بیر گون فرج عمی باغلیق ائشیب یونجا باغلاییرمیش کی بیردن بیره گؤرور بیر آیری عجیبه-غریبه شخص بونون ایش‌لرین یانسیلاییر. فرج عمی هر نه ایش گؤرور بو غریبه شخص ده اونو تکرار ائله‌ییر. فرج عمی آنلاییر کی بو جین‌دیر. چونکی جینی گؤرن‌لردن ائشیتمیش ایمیش جین‌لر آدامی لاغا قویوب گؤردویو ایش‌لری یانسیلارلار.

فرج عمی بیراز فیکیرله‌شیر سونرا ائشدیگی باغلیق ایله اؤزونون قیچین و سونرا قوللارین باغلاماقا باشلاییر. جین ایسه همین بو ایشی اؤزونون اوستونده گؤروب و اؤز قیچ-قولون باغلیق ایله باغلاییر. فرج عمی بیردن بیره یانینداکی اوراق ایله باغلیقی کسیب و اؤز قیچ-قولون آچیر آما جین اوراغین دمیر اولدوغو اوچون اونا یاخین دوشه بیلمیر و قولو-قیچی باغلی تله‎یه دوشور. فرج عمی تئز خودوندان (کُت) بیر سانجاق چیخاردیب جینین پالتارینا سانجیب و جینی اؤزونه قول (نؤکر – بنده) ائله‌ییر.

فرج عمی جینی کنده آپاریب و اوندان چوخلو ایش‌لر چکیر. ائو ایشیندن توت تا چؤل ایشینه کیمی بو جین مهارت و سرعت‌له گؤرورموش. جینین پالتارینداکی سانجاغین اولماسینا گؤره هئچ بیر یئره قاچا بیلمیرمیش. آخی جین‌لر دمیردن قورخوب اونا تسلیم اولارلار.

گون‌لرین بیر گونو جین چایدا پالتار یویورموش کی بیردن بیر قیز اوشاغینا راست گلیر. جین بو قیزا دئییر کی آی قیز منیم اَللریم باتیق‌دیر، ایمکانی اولسا منیم پالتاریمدان بو سانجاغی آچگینان. قیز ایسه ماجرادان خبرسیز جینین بو سانجاغین پالتاریندان آچیر. سانجاق جینین کؤینه‌ییندن قوپان همین جین غیب اولوب قاچیر.

چاربورج‌لو قوجا آتا-آنالارین دئدیک‌لرینه گؤره جین آزاد اولاندان سونرا فرج عمی گیلین دام‌لاری‌نین اوستونه گئدیب باجادان اونلارا دئییر: من آزاد اولدوم آما نه یازیق کی سیز منیم قدریمی بیلمه‌دیز. اگر مندن سوروشسایدیز بوتون دردلرین و نوخوشلوق‌لارین درمانین بیلیردیم. ائو آدام‌لاری دئییر نه اولار اونلاردان بیر نئچه‌سین سؤیله‌گینن. آما جین دئییر کی داها اولماز چونکی من آزاد اولموشام. جین او گوندن چیخیب گئدیر و بیرداها گؤزلره گؤرونمور.

بلکه بو یازی‌لاری دا سئوه‌سیز!

2 جاواب

  1. ocaq گفت:

    بو مشترک خاطره‌لر چوخ ارزشلی‌دی.

  2. شاهین گفت:

    فرج عمی اورمیه دریاچه سین قورودان جینلری ده توتابیلر می؟!

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *