چاربورجون پاییزلاری…
دوزدور کی پاییز گلنده سانکی هر نه هزین بیر کدر ایچینده سوسور… قوشلار اوچوب گئدیر و بوتون طبیعت سولوب سارالیر آما بو سولغون طبیعت ده بیر بؤیوک گؤزللیک یاشاییر. سانکی چؤل-چمن یاشیل دونون چیخاردیب، قیزیل و ساری بویاقلی کؤینَیین گئییر. دونن یاشیل اولان یارپاق بوگون ساری رنگ ایله آغاجدان دوشوب و خاطیره لره چئوریلیر. یاغیش یاغیر، چن یئره قونور و طبیعتی قات-قات دومان بورویور. بو آرادا چاربورجون پاییزلاری دا بام باشقا اولور. بئله کین هر باخانی فیکره جومدوروب و کائناتین سیرینه آپاریر.
قاریاغیر نارین –نارین
اوزو گولور داغلارین
او یاشیل یارپاغلارین
سولانی خاطیره دیر…
