وارلیق، غم کؤلگه سی/ چیچک حسین زاده (آغ بولوتدان) شعرلر

اوجاق چهاربرج

چیچک خانیم آغ بولوت(چیچک حسین زاده) ائلیمیزین گؤزل قادین شاعیر و یازیچی لاریندان دیر. اونون شعرلری آنا دیلیمیز تورک دیلینده یازیلیب و آذربایجانیمیزین بؤیوک خصوصیت لرین داشیان گون مسئله لرین، آغیرلیق لارین و مدنی ایستک لرین تصویره چکیر.

چیچک خانیم آذربایجانیمیزین بؤیوک محقق و یازیچی سی اوستاد علی داشقینین قیزی دیر. حقیقتا ده آتاسی نین قیزی دیر! او حورمتلی و سایین آتاسی نین یولونا آیاق قویوب و گنج یاشیندان ائلیمیزه گؤره یازیب و وطن شاعیری اولماغا سؤز وئریب دیر. اوجاق سایتی چیچک خانیما گونو-گوندن باشاریلار و آیدین گلجک لر آرزی ائدیب و گؤزل شعییرلرین بیز ایله پایلاشماق دان تشکر ائله ییر.

غم کؤلگه سی!…

غم کؤلگه سالیب عالمه دریالاردان

قارلار بئله قورخور اله نَن آغ قاردان.

انسان اوجاقی بوز دوغورور آتشدن

“بابک” بوغازی قورتولابیلمیر داردان.

عؤمرون آغاجی غنچه یه حسرت قالمیش

گول آلماییر اوندان بری دیر یار، یاردان.

گؤنلون قاپیسی چوخدان آچیق دیر آنجاق

جان تؤحفه سی گلمیر قاپالی بازاردان.

بیلمم نه قدر گؤزله یه جک انسانلیق

بولبول چکه جک ظولمو جفالی خاردان؟

بیر گونده یاغار اولسا بولوتلار گؤیدن

یوردون آغاجی باش اَیَر آغیر باردان.

**************************

وارلیق

بیر قاشیق یئمه ییم اولسایدی کئشکه

غیرت قازانیندان، شرف اودوندان!…

بیر تیکه چؤره ییم اولسایدی کئشکه

وطن تندیریندن، یورد اوجاغیندان!…

بیر اودوم سو ایچه بیلسه یدیم کئشکه،

کیملیک چشمه سیندن، من دنیزیندن!…

او زامان،

دویاردیم اؤز وارلیغیما!…

بلکه بو یازی‌لاری دا سئوه‌سیز!

2 جاواب

  1. korkut گفت:

    یاشاسین آزربایجانین بئله ایگید قیزلاری.
    اوره یینه ساغلیق، دویغولاندیم.

  2. Əəmir گفت:

    Çoxxxxx yaşa çox gözəl. Yaşasın türk

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *