اورمو عاشیق مکتب ینین بیرینجی ساز-سؤز اوستادی/ عاشیق باهار بالکانلی

عاشیق باهار بالکانلی.اوجاق سایتی.

اوجاق-بیلال رحمتی: آشیق باهارعلی بالکانلی 1329_جو گونش ایلینده قوشاچای شهرینین کوردکندی کندینده آنادان اولموشدور.
او 1381_جی ایلین شهریور آییندا بیر قضا گئچیریب، گؤزلرینی بو دونیایا یومور. بو اولایدا اونون سازی دا سینیب، نئچه يئره بؤلونور اونون اوچون ده او، اوره یی دردلی و گؤزلری نیگران بو دونیادان کؤچور و روحو ابدییته قوووشور.
رحمتلی آشیق باهارعلی چوخ کیچیک یاشلاریندان بری آشیق صنعتینه ماراق گؤستریب، آتاسی رحمتلی آشیق عبدالعلی سایه سینده ساز_سؤز ایله تانیش اولوب، اورمو آشیق مکتبینده اؤزونو گؤستريب، توی و دویونلرده، آشیق فستیوالی و یاریشمالاریندا چیخیش ائتمه یه باشلادی.
گَنج یاشلاریندان بیر چوخ آشیقلاری ساز ایفاسی ایله حیران ائدن آشیق باهارعلی، موسیقی ساحه سینده نه قده ر بؤیوک بیر گوجه مالیک اولدوغونو ایثبات ائتدی. بونا گؤره ده آذربایجان آشیق صنعتی، اؤزه للیکله ده اورمو آشیق مکتبینده داحی بیر شخصیت اولان آشیق دهقان، رحمتلی آشیق باهارعلی_نين ساز ایفاسینا باییلاراق “آشیق باهارعلی_نین بارماقلاری ساتمالی اولسایدی یعقین کی، من اونلاری آلاردیم” دئمیشدیر.
رحمتلی آشیق باهارعلی ایسلام اینقیلابیندان اؤنجه 1351_جی ایلده بیلمه دن رییاکار اینسانلارا اویوب، آلداناراق بیر آجی قضا گئچیریب، اوزون ایللر دوستاقدا(زندان) عؤمور سورمه یه معروض قالمیشدیر.
آشیق باهارعلی دوستاقدا اولدوغو زامان شعر صنعتی ایله ده تانیش اولدو و بیر چوخ شعر و قوشمالار یازدی.
اونون یازدیغی قوشما و شعرلر یاشادیغی آجی خاطیره و غملی حیاتین گؤسترگه سیدیر.
آشیق باهارعلی بالکانلی ایسلام اینقیلابیندان سونرا دوستاقدان آزاد اولوب، آشیق صنعتی ایله حیاتینا دوام ائدیر. بو آرادا آشیق باهار اورمو آشیق مکتبینه «سارای» و «توفارقان سفری» آدلی ایکی يئنی آشیق هاواسی آرتیرمیشدیر . آشیغین بو ساحه ده بیر چوخ اؤيرنجيسی اولموشدور، او جومله دن: رحمتلی آشیق بهروز فرجی، آشیق بهمن صبوری، آشیق هیدایت موسی اوغلو، آشیق جمشید، باکیدا یاشایان آشیق ابولفظل قاراداغلی و …
رحمتلی آشیق باهارعلی آذربایجان_ین داحی موغننیسی ایقبال آذر ایله بیر مجلیسده دوئت اوخوموشلار، ایندی ایسه بو ایفا اورمو رادیو آرشیوینده قورونور.
آشیق سون زامانلاردا عرفان مکتبینده گؤنوللو اوخویاراق بیر عاریف کیمی دونیادان کؤچ ائتدی. روحو شاد اولسون.

 

شعرلریندن بیر اؤرنك/گرایلی:
” قوربان اولوم “

یاخشی یامان دوستون حالین

قانان دوستا قوربان اولوم

آلیشاندا سندن قاباق

یانان دوستا قوربان اولوم

ناحاق دوشدوم بو دوستاغا

بیر کسیم یوخ سؤز دئماغا

بو حالدا منی گؤرماغا

گلن دوستا قوربان اولوم

وفالی دوست یئتر دادا

آللانماز شؤهرته آدا

شرافتلی بو دونیادا

قالان دوستا قوربان اولوم

من گؤرموشم چوخو آزی

خزان باهار پاییز یازی

باهار دئیه ر تئللی سازی

چالان دوستا قوربان اولوم

یازار: بیلال رحمتی

بیلال رحمتی

بلکه بو یازی‌لاری دا سئوه‌سیز!

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *