هوزورلو گونش – احمد جوادی’دن بیر شعر
سئوگیلیم من اؤلوب گئدندن سورا
قبریمین اوستونه بیرجه کلمه یاز:
“ییغیشیب باشیما هئچ آغلامایین”
اؤلموشم! آغلاماق یارا بیتیرمز
سیز آللاه آغلایین اؤز احوالیزا!
من اؤلوب گئتمیشم بس بونا نه غم؟
آما سیز دیری‌کن اؤلوب گئتمیسیز!
آما سیز آچمامیش سولوب گئتمیسیز!
سیز کی قبیرده نفس چکیرسیز
هر گؤزل گؤرورسوز “حوس” چکیرسیز
سیز کی هر قوشا “قفس” چکیرسیز
سیز آللاه آغلایین اؤز احوالیزا
سیز آللاه چیغیران ناز دویغولارین
بیرجه یول سسینه سسیزی وئرین
سیز آللاه دیله‌نَن نازلی قیزلارین
سسینه سس وئریب دولوب آغلایین
آغلایین “دوستاغیز” سَسیزدن اوچسون!
آغلایین “زنجیریز” بلکه قیریلسین!
یالوارین “شاه”یزا قَمچی وورماسین!
سیز آللاه آغلایین اؤز احوالیزا
سئوگیلیم قوی آنام هوزورلو قالسین
بیر “ساز” آل گونشی هوزوردن چیخارت!
ائل اوبام هوزورلو قالسا عیبی یوخ
آماندیر وطنی هوزوردن چیخارت!
سئوگیلیم دوست قوهوم گلنده بیزه
کی آنام قاراسین چیخارسین دیزه
گؤندر اونلاری “اورمو” – “تبریزه”
آماندیر وطنی هوزوردن چیخارت
آماندیر وطنی هوزوردن چیخارت.
آللاه قووات وئرسین احمد قارداش 😉
خوش گلدین قارداش گؤزوم اوسته