تورک خواننده “علی پرمهر”ین یئنی آهنگی یاییلدی
علی پرمهرین بو آهنگی نین آدی “سلام یئتیر” دیر. علی بو آهنگ ده دوغما آذربایجانینا و اؤزونون دوغولدو کنده، شهره و مغان ائللرینه سلام یئتیریر. علی پرمهر مغان دا آنادان اولوب آما تهران دا یاشاییر. علی بیر چوخ فارس خواننده لر ایله ایش بیرلیک آپاریب، محسن چاوشی و فرزاد فرزین اونلاردان بیر نمونه دیلر کی علی اونلارا آهنگ دوزلدیب. محسن چاوشی نین آدلیم “بازار خرمشهر” آهنگی علی نین ایشی دیر.
علی تهراندا یاشادیغی اوچون طبیعی کی یوخاریدا سایدیغیمیز هنرمندلرله بیر یولدا ، یولداش اولسون. ایش بازاری و بیر چوخ فاکتورلار بو ایشه عامیل اولابیلیر. آما علی نین اورگینده سؤنمز بیر عشق داییما چیرپینماقدایدی؛ سؤنمز بیر عشق آذربایجانینا و آنادیلی تورک دیلینه. علی نین دئدیگینه گؤره بیر گون تهراندا اوستاد شهریارین حیدربابا منظومه سین اوخویاندا چوخ ائتگی لنیب و گؤزلری دولور. علی دوشونور کی هاردان گلیب، هاردا دوغولوب و هانچی دیلین و موسیقی نین ییه سی دیر. علی دوشونور کی بوگون آنا دیلی و تورک موسیقی سی ایراندا چوخ یالقیز قالیب. پس چالیشیر کی موسیقی میزه تَزه بیر جان وئرسین. او بو جانی “یاغیش آلتیندا وئریر!”
علی نین بیرینجی آلبومو “یاغیش آلتیندا” آدیندا بازارا چیخیر و چوخلو طرفدارلار قازانیر. بوتون ایران تورک لری سئویندیریجی بیر حالدا بو آلبومو دینله ییرلر. حتی تورک اؤلکه لرینده ده علی نین آدی و آلبومو سسلَنیر و چوخلو آلقیش لار قازانیر. بو آلبومدان سونرا علی نین تبریزده، یاندیرما، سن جان ایسته، من تورکم و آختار منی آهنگلری یاییلماغا باشلاییر.
او گوندن بری هر زامان یاغیش آلتیندا اولاندا علی نین گؤزلرین یادیما سالیرام و بیر سیر دوشونورم: اگر ظالیمین گوجو اولسا، مظلومون آللهی وار! موغانلی علی! سنی تانری گؤندریب موسیقی میزین و آنا دیلیمیزین باش اوجا یاشاماسینا. سن اؤز دیلینده یازیب اوخویا بیلمه ین کؤرپه اوشاقلارین دوعاسی سان.
سلام هادی جنابلاری
الله اؤز فرهنگ و آنا دیلی نین اوجالماسینا چالیشان هامی گنج لری قوروسون.
سیزی اوجاق دا گؤردویوموز اوچون چوخ سئوینیریک!