ایکی سئودا، ایکی پاشا
وحید مدبر-سرویس ورزشی اوجاق، ایران سوپرلیگی‌نین ۱۶-جی فصلینده آذربایجان اوچ تیم ایله اشتراک ائده‌جک. تراختور، ماشین و گسترش تاخیم‌لاری تبریزدن بو اویونلارا قاتیلاجاقلار. تراختورچولار، ماشینچیلار و پولادچیلاری بؤیوک هیجانلار گؤزله‌ییر بو فصل.
ماشین فوتبال کلوبونون ایییرمی ایلدن سونرا ایران’ین اوستون لیگینه یوکسه‌لمه‌سی تورک فوتبال سئونلر توپلوموندا یئنی بیر سئوینج یارادیب.
یاشیل گئییملی ماشین تاخیمی تراختوردان بیر ایل قاباق ۱۳۴۸-جی گونش ایلینده تبریزین بیر نئچه فوتبال اویونچوسونون کؤمه‌یی ایله تاسیس اولونوب. دئمک آذربایجانین ان اسکی تیمی‌دیر ماشین.
ماشین تراختورون گله‌نکسل (سنتی) رقیبی‌دیر. تبریزین بو ایکی سئویملی تاخیمی‌نین کئچمیش ایللرده کی دئربی‌سی همیشه اؤزل هیجانلا قارشیلانیب.
تراختور، ایران تورکلری‌نین ایچینده ان چوخ دستکچیلی تاخیم حسابا گلیر. ماشین ایسه تبریزین لاب قدیمی فوتبال کلوبو اولاراق دلی‌قانلی هوادارلارا صاحیب‌دیر.
تراختور و ماشین آذربایجان’ا لاییق نماینده اولماق اوچون ترانسفر فصلی چالیشیبلار گوجلو تیم باغلاسینلار. بونو دا دئمک اولار کی باشاریبلار.
بونون اوچون تراختورچولار ایلک آددیمدا کلوب باشقانین دَییشدیلر. سردار آجورلو تراختورون یئنی باشقانی اولدو. آجورلو ایلک گلدیگینده هوادارلار ایله آرانی سازلاماغا باشلادی. هوادارلارلا باشگاهین رابطه‌سین یاخجی‌لاتدی. او ایلک چالیشماسیندا امیر قلعه نویی’نین قراردادین تمدید ائله‌دی.
تراختورچولار اساس هدف لرین قهرمانلیق تعیین ائدرکن لوسیانو ادینهو، کرار جاسم، محمد نوری، محسن بنگر، سینا عشوری، سعید آقایی، محمد ابراهیمی کیمی اولدوز اویونچولارلا قرارداد باغلادیلار. هم ده تیمین یاخجی اویونچولاری‌نین قراردادین تمدید ائله‌دیلر.
بو ایلین تراختورو باش مشقچی‌دن توتوب اویونچولاراجان هوادارلار اوره‌یینده یاخجی یئر ائله‌ییبلر. بو فصلده تراختورون اویونلاریندا استادیومون قالابالیق اولاجاغی گؤزله‌نیلیر.
ماشینچیلار سوپرلیگه یاخجی گیریب و اویغون مقاما چاتماغا گؤره ایلک آددیمدا اوز یئرلی (بومی) باش مشقچی‌لری رسول خطیبی ایله تمدید ائله‌دیلر. ترانسفر بازارینا گیریشه‌رک چالیشدیلار یاخجی بومی اویونچولار گتیرسینلر. هم ده تیمین باغلاماغیندا اویونچولارین تورک اولماغینی اساس هدف توتدولار. بو دوغرولتودا ایسه تانینمیش تورک اویونچولارلادا قرارداد باغلادیلار. هم ده نئچه تانینمامیش استعدادی اوزه چکیب اوستون لیگه معرفی ائتدیلر.
ماشینین یئنی آلدیغی تانینمیش تورک اویونچولار پیام صادقیان، حبیب گردانی، سعید دقیقی، احمد امیرکامدار، سامان نریمان جهان و بهمن کامل کیمی‌لردیلر. اوزه چکیلن تانینمامیش اویونچولاردان دا سهراب ادیب’ی آد آپارماق اولار کی تمرینی اویونلاردا یاخجی گؤرونوش سرگیله‌ییب.
هوادارلار بو ایکی فوتبال تیمینه چوخلو امید باغلاییبلار، یاخجی نتیجه گؤزله‌ییرلر، یوخاری رده‌لر گؤرمک ایسته‌ییرلر.
☆بو ایکی تیم حاقدا ماراقلی اوخشار مقاملارا اشاره ائله‌مک اولار:
*هر ایکیسی آذربایجانین ان قدیمی تاخیملاری‌دیلار. هم شهرت هم ده چوخلو هوادارلارا صاحیبدیلر.
*بو ایکی تیمی آذربایجانین ایکی معروف ستارخان و باقرخان قهرمانلارینا اوخشاتماق اولار. بیر آماج اوچون، آذربایجان’ین با اوجالیغی اوچون چالیشان قارداشلار.
*تراختور و ماشین’ین باش مشقچی‌لری امیر قلعه نویی و رسول خطیبی هر ایکیسی ده ده طرفدارلاردان “پاشا” لقبین آلیبلار.
*بو ایکی تاخیمین هوادارلارینا گؤره بولارین دئربی‌لرین استانبول’ون معروف دئربی‌سینه اوخشاتماق اولار. هیجانلی گالاتاسرای و فنرباخچا دئربی‌سی.
****تانری یاردیمجی اولسون کی بو ایکی هوادارلی تیم، اوچونجو گوجلو و مدرن تیمیمیزله گسترش ایله برابر چوخلو موفقیت‌لره چاتسینلار و بیر گون اولسون جدولین اوچ ایلک سیرالاریندا بو اوچ تاخیمیمیز یئرلشسین.
اورگیمیزین ایکی سئوگیلی
بیری یاشیل‌دیر بیری قیرمیزی
قیرمیزی تیراختور یاشیل ماشین
ایکی مشقچی‌میز بیر مشقچی
او دا پاشادیر بو دا پاشادیر
امیر پاشا، رسول پاشا
وحید مدبر چهاربرج-هفته نامه مهد تمدن-سال سوم-شماره 88 – شنبه 19 تیرماه 95
آذربایجان تیم لر فرق المز رهلری